Питрәч районында ут белән саксыз эш итү аркасында дачада янгын чыккан

Утны сүндерергә теләп, олы яшьтәге хатын битен, аяк-кулларын пешергән.

(Казан, 11 май, “Татар-информ”). Татарстаның Питрәч районында ут белән саксыз эш итү аркасында “Петрово” бакчачылык ширкәтендәге дача йорты янган. Бу хакта Татарстан Гадәттән тыш хәлләр министрылыгының матбугат хезмәте хәбәр итә.

“12:23 сәгатьтә Гадәттән тыш хәлләр министрлыгына 112 системасы буенча Питрәч районының “Петрово” бакчачылык ширкәтендә дача януы турында хәбәр килде”, - диелә хәбәрдә.

Янгын сүндерчеләр килгәндә, 24 квадрат метрлы дача йортын ут камап алган була. Шулай ук 300 квадрат метрда коры үлән дә янган.

Янгында 1937 нче елгы хатын-кыз зыян күргән. Пенсионерның бите, аяк-куллары пешкән, аны Питрәч хастаханәсенә алып киткәннәр.