Балык Бистәсе районындагы юл һәлакәтендә машина йөртүче һәм пассажирның гомере өзелгән

М7 трассасының 919 чакрымында җиңел автомобиль йөк машинасы белән бәрелешкән.

(Казан, 10 июль, «Татар-информ»). Балык Бистәсе районында «Ауди» автомобиле «Вольво» йөк машинасы белән бәрелешкән, ике кеше һәлак булган, тагын берсе хастаханәгә озатылган, дип хәбәр иттеләр «Татар-информ»га Россия Гадәттән тыш хәлләр министрлыгының Татарстан буенча Баш идарәсеннән.

Бүген көндез 112 бердәм ашыгыч хезмәт номерына М7 трассасының 919 чакрымындагы һәлакәт турында мәгълүмат килеп ирешә.

Фаҗига урынына Бөкәш авылы янгын сүндерүчеләре, табиблар бригадасы һәм полиция хезмәткәрләре килгән.

Юл-транспорт һәлакәте нәтиҗәсендә җиңел машинаның 50 яшьлек йөртүчесе һәм 21 яшьлек пассажиры урында ук һәлак булган. «Ауди» машинасының тагын бер 13 яшьлек пассажиры хастаханәгә озатылган.

Һәлакәтнең тулы сәбәпләре ачыклана.