Чаллыда ремонт ясаучылар бергәләп югарыдан егылып төшкән

Автокалада шундый гадәттән тыш вакыйга булган

 (Казан, 10 апрель, “Татар-информ”). Чаллыда шаккатмалы вакыйга булган. Ремонт ясаучы бригада балкон тышлаганда люлька белән бергә 3 нче каттан килеп төшкән. Бик каты имгәнгән эшчеләр бергә сырхауханәгә озатканнар, дип хәбәр итә “Шәһри Чаллы” газетасы.

Шул рәвешле, 9 апрель иртәнге 9да Чаллының Яңа Шәһәр комплексындагы 16/11 нче йорт янында, иртәнге планеркадан соң, 3 эшче төзелеш люлькасында 3 нче кат турысына күтәрелгән һәм, ниндидер сәбәптән, кинәт күтәрткеч өзелеп, ирләр люлька белән бергә егылып төшкән. Эшчеләрнең берсенә 46 яшь булып, калган икесенә – 39ар яшь.