Татарстанда җиңел машина һәм такси бәрелешкәч, биш кеше имгәнгән

Кичә иртән республиканың Арча районында ике «Лада» машинасы катнашында авария булган.

(Казан, 7 март, «Татар-информ», Полина Шевчук). Кичә республиканың Арча районында Яңа Кенәр — Шурабаш юлында унберенче яртылар тирәсендә авария булган. Биредә җиңел машина һәм такси бәрелешкән, биш кеше зыян күргән

«Татар-информ»га юл-транспорт һәлакәте шаһитлары сөйләгәнчә, «Лада Гранта» һәм «Лада Ларгус» (такси) бәрелешкән. Көчле бәрелүдән ике машина да юл читенә төшеп киткән.

Юл-транспорт һәлакәтендә машина йөртүчеләрнең икесе дә, шулай ук таксидагы дүрт пассажир зыян күргән. «Лада Гранта» хуҗасы аягы һәм иңбашы нык авыртуга зарланган, шулай ук боты яраланган. Икенче машинаның 63-65 яшьләрдәге йөртүчесе кулын нык җәрәхәтли һәм күкрәге авыртуга зарлана. 

«Пассажирларның берсе — 60 яшьлек хатын-кызның аягы сынган һәм иңбашы имгәнгән. Тагын бер пассажир хатын-кызны һәм 10-12 яшьлек кызны ашыгыч ярдәм табиблары шулай ук хастаханәгә алып китте», — диде агентлыкка вакыйга шаһитлары.