Казандагы шәхси йорт ишегалдында кар астында калган хатын-кыз үлгән

Түбәгә кар көрәргә менеп баручы хатын-кыз өстенә кар ишелеп төшкән.

(Казан, 7 март, «Татар-информ»). Казанда шәхси йорт ишегалдында өстенә кар ишелеп төшеп, бер хатын-кыз үлгән. Бу хакта «Татар-информ»га Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.

Фаҗига шәһәрнең Авиатөзелеш районында Смоленск урамында булган.

Беренчел мәгълүматлар буенча, хатын түбәне чистартырга теләп, баскычтан менәргә маташкан. Шул вакытта аның өстенә кар ишелеп төшкән. Хатын-кыз кар көрте астында калып, сулыш ала алмыйча үлгән.

Исегезгә төшерәбез, 2 март көнне Темясово авылында 80 яшьлек пенсионер түбәдән төшкән кар астында һәлак булды. Әлеге факт буенча Тикшерү комитеты тикшерү оештырды.