Нурлатта янгыннан 81 яшьлек әбине коткарганнар

Башлангыч фараз буенча янгын электр җиһазларының төзек булмавы аркасында килеп чыккан.

(Казан, 6 май, «Татар-информ», Наталия Никифорова). Татарстанның Нурлат районында янгында өлкән яшьтәге хатын-кызны коткарганнар. Бу хакта «Татар-информ»га ТР буенча Россия Гадәттән тыш хәлләр министрлыгы Баш идарәсенең матбугат хезмәтендә хәбәр иттеләр.

5 май көнне кичке алтынчы яртыда Нурлатта Ленин урамындагы 2нче йортта янгын чыккан.

Янгын сүндерүчеләр йортның икенче катындагы бер бүлмәле фатирда җиһазга ут кабуын ачыклаган. Йорт хуҗасы өйдә булмаган, аның каравы күрше фатирда 81 яшьлек күршесе булган.

Янгын сүндерүчеләр төтен баскан йорттан сулыш алу аппараты битлеге ярдәмендә әбине фатирдан алып чыккан.

Башлангыч фараз буенча янгын электр җиһазларының төзек булмавы аркасында башланган.