Казанда 11 яшьлек кызны бәрдереп, авария урыныннан качып киткән шоферны эзлиләр

Юл һәлакәте Королев урамында булган.

(Казан, 5 август, «Татар-информ»). Казанда 11 яшьлек кызны бәрдереп, авария урыныннан качып киткән шоферны эзлиләр. Бу хакта шәһәр дәүләт автоинспекциясеннән хәбәр иттеләр.

«Узган шимбәдә иртән Королев урамындагы 47нче йорт янында тиешле булмаган урында юл аша чыккан кызны машина бәрдергән. Машина йөртүче авария урыныннан качып киткән, кызның исә терсәге җәрәхәтләнгән», - дип белдерделәр ведомствоның матбугат хезмәтендә.

Казан шәһәре Дәүләт автоинспекциясе, әлеге юл һәлакәтен күрүчеләр булса, (843) 5-333-819, 5-333-848 телефоннары аша хәбәр итүләрен сорый.