Казанда ут капкан иномарканың двигателе һәм салонының бер өлеше янган
Янгынның мәйданы 2 квадрат метр тәшкил иткән.
Скопировать ссылку
(Казан, 4 декабрь, «Татар-информ»). Бүген иртән Казанда чит ил автомобиленә ут капкан, машинаның двигателе һәм салонының бер өлеше янган. Бу хакта «Татар-информ» агентлыгына Россия Гадәттән тыш хәлләр министрлыгының Татарстан буенча Баш идарәсенең матбугат хезмәтендә хәбәр иттеләр.
Бүген иртәнге сигезләр тирәсендә янгын сагы номерына (101) Воровский урамындагы 1нче йорт каршында «Хонда» автомобиленә ут кабу хакында хәбәр килгән.
Урында машинаның мотор бүлеге януы ачыкланган.
8.08 сәгатьтә янгынны тулысынча сүндергәннәр. Нәтиҗәдә, 2 квадрат метр мәйданда салонның бер өлеше һәм автомобильнең мотор бүлеге янган. Беркем дә зыян күрмәгән.
