Казанда юл-транспорт һәлакәтендә мотоциклчының гомере өзелгән

Һәлак булган егет якын көннәрдә туй итәргә җыенып йөргән.
(Казан, 4 сентябрь, “Татар-информ”). Казанда юл-транспорт һәлакәтендә мотоциклчы вафат булган. Һәлакәт 1 сентябрьдә Тихомирнов һәм Ульянов-Ленин урамы киселешендә килеп чыккан: “Кавасаки” мотоциклындагы 24 яшьлек егет югары тизлектә “Киа Серато” автомобиленә бәрелгән.
 
Мотоциклның югары – сәгатенә 100 чакрымнан да ким булмаган тизлеге турында аның 70 метрга сузылган тормоз юлы сөйли, дип яза “Вести КАМАЗа” порталы.
 
Һәлакәттә башын нык имгәткән егет кома халәтендә хастаханәгә озатыла һәм кичә аның гомере өзелә. 16 сентябрьгә аның туе билгеләнгән булган.