Татарстанда тагын 54 кеше коронавирус йоктырган

20 сентябрьгә Татарстанда Covid-19 белән авыруның барлыгы 26 486 очрагы теркәлгән.

(Казан, 20 сентябрь, «Татар-информ»). Татарстанда коронавирус инфекциясе белән авыруның 54 яңа очрагы теркәлгән.

Аларның өчесе — читтән кайткан, 51 очрак авыру аралашу вакытында йоккан.

«24 кеше хастаханәгә салынды, 30 кеше өйдә дәвалана», — диелә Татарстан Республикасы Сәламәтлек саклау министрлыгыннан алынган хәбәрдә.

Казанда вирусны йоктыручылар 20 кеше, Чаллыда — 16, Лаеш районында — 4, Бөгелмәдә — 3, Әлмәт, Нурлат, Тукай районнарында — 2, Азнакай, Зәй, Кукмара, Мамадыш, Мөслим районнарында берәр кеше авыру йоктырган.

20 сентябрьгә Татарстанда Covid-19 белән авыруның 26 486 очрагы теркәлгән. Пандемия башланганнан бирле 22 918 кеше савыккан, шул исәптән узган тәүлектә савыгучылар саны 6 кеше.

Барлыгы 1 060 682 кеше вакцина ясаткан, шулар арасыннан 929 209 кешенең икешәр прививкасы бар.