Татарстанда тагын 58 кеше коронавирус инфекциясе йоктырган

Пандемия башланганнан алып республикада коронавирус инфекциясенең 26,4 мең очрагы теркәлгән.

(Казан, 19 сентябрь, «Татар-информ», Сельвина Илкәева). Татарстанда соңгы тәүлектә Covid-19 коронавирус инфекциясе йоктыруның 58 яңа очрагы ачыкланган.

ТР Сәламәтлек саклау министрлыгының матбугат хезмәтеннән хәбәр итүләренчә, аларның барысы да чирне башка авырулар белән аралашу нәтиҗәсендә эләктергән.

«24 кеше хастаханәгә озатылган, 34 кеше өендә дәвалана», - диелә ведомство хәбәрендә.

Казанда – 21, Чаллыда – 17, Лаеш районында – дүрт, Әлмәт районында – өч, Зәй һәм Түбән Кама районнарында – икешәр, Актаныш, Арча, Баулы, Алабуга, Яңа Чишмә, Нурлат, Саба, Спас һәм Чистай районнарында берәр очрак ачыкланган.

Пандемия башланганнан алып республикада коронавирус инфекциясенең 26,4 мең очрагы теркәлгән, 22,9 мең кеше терелгән.