Татарстанда Covid-19 пандемиясе шартларында эшләүчеләр өчен флешмоб оештырдылар

#Мынаработедлявас #Безэшлибез хэштегы буенча табиб, укытучы һәм тәртип сакчыларын табып, рәхмәт белдерергә мөмкин.

(Казан, 19 апрель, «Татар-информ»). Татарстанда коронавирус инфекциясе таралу куркынычына карамастан, эшләүләрен дәвам итүчеләр өчен социаль челтәрләрдә флешмоб оештырдылар. Бу турыда оештыручылар хәбәр итә.

«Якыннарыгыз һәм туганнарыгыз өйдә калганда, сез — заман геройлары безнең өчен эшлисез. Еш кына үз сәламәтлегегезне куркыныч астына куеп, безнең гомерне саклап каласыз, балаларны укытасыз, йортларда иминлек, җылылык тәэмин итәсез. Буш вакытыгызда флешмобта катнашыгыз һәм #Мынаработедлявас #Безэшлибез хэштегы белән үз фотогызны куегыз. Сезне танып белү һәм рәхмәт әйтү мөмкинлеге бирегез», диелгән оештыручылар хәбәрендә.