Казанда һәм Алабугада ОРВИ эпидемия чигеннән артып киткән

Тулаем Татарстанда ОРВИ һәм грипп эпидемия чигеннән түбән.

(Казан, 14 гыйнвар, «Татар-информ», Гөлнар Гарифуллина). Татарстанда кискен респиратор вирус инфекцияләре (ОРВИ) белән авыру Казанда һәм Алабугада эпидемия чигеннән югары. Бу хакта ТР Министрлар Кабинетында брифингта Роспотребнадзор хезмәтенең Татарстан буенча идарәсе җитәкчесе Марина Патяшина хәбәр итте.

Ул Европа илләрендә грипп активлашуын, кайберләрендә эпидемия булуын әйтте. Республикада грипп эпидемия чигеннән түбән булуын билгеләп үтте.

«6-12 гыйнварда 12 928 ОРВИ очрагы теркәлгән, бу эпидемиядән 17 процентка түбән. Казанда эпидемия чигеннән 33 процентка югары. Алабугада эпидемия бусагасыннан 24 процентка артык. Калган җирләрдә вазгыять тыныч», — диде Марина Патяшина.

Идарә җитәкчесе авыру билгеләре күренсә, олыларга да, балаларга да эшкә, балалар коллективларына, төрле җәмәгатьчелек урыннарына барырга ярамавын искәртте.