Британиянең Covid-19 штаммы Башкортстанда ачыкланган

Республикадан коронавирусның башка штаммнарын ачыклау өчен "Микроб" фәнни-тикшеренү институтына авыручылардан 48 биологик материал җибәрелгән.

(Казан, 10 май, «Татар-информ»). Британиянең коронавирус йогышы штаммы Башкортстан территориясендә табылган. Бу хакта Интерфакс Роспотребнадзорның төбәк идарәсе җитәкчесе Анна Казакка сылтама белән хәбәр итә.

«Әйе, безнең республика территориясендә Британия вирусы штаммы ачыкланды. Вирус йоктыручылар авыр хәлдә түгел. Аларның бер өлеше савыкты инде», — диде Казак җомга көнне киңәшмәдә.

Ул республикадан коронавирусның башка штаммнарын ачыклау өчен «Микроб» фәнни-тикшеренү институтына авыручылардан 48 биологик материал җибәрелгәнлеген әйтте.