Коронавируска каршы «Авифавир» препараты мәҗбүри медицина иминияте буенча бушлай була

Даруны белгеч кушуы буенча һәм дәвалаучы табибның катгый контроле астында кулланачаклар.

(Казан, 7 ноябрь, «Татар-информ»). Коронавирус инфекциясенә каршы «Авифавир» препараты амбулатор куллану өчен бушлай булачак. Бу хакта РИА Новости агентлыгы хәбәр итә.

«Әлеге препаратны медицина учреждениеләрендә коронавирус инфекциясеннән дәваланучы пациентларга мәҗбүри медицина иминияте программасы буенча бушлай тәкъдим итәләр инде», - дип белдерделәр Россия туры инвестицияләр фондында.

РФ Сәламәтлек саклау министрлыгының даими теркәү таныклыгы 460 пациент катнашында үткәрелгән клиник сынауларның уңай нәтиҗәләре нигезендә бирелде.

«Авифавир» белгеч кушуы буенча һәм дәвалаучы табибның катгый контроле астында кулланылачак. Элегрәк федераль министрлык «Коронавир» һәм «Арепливир» препаратларын амбулатор кулланырга рөхсәт иткән иде. «Авифавир» фавипиравир нигезендә ясалган өченче дару булды.