Анталиядән кайткан алты кешедә Covid-19 инфекциясе ачыкланган

Барлык пациентларның да авырулары симптомсыз формада уза.

(Казан, 7 май, «Татар-информ»). Табиблар Анталиядан кайткан 6 Татарстан кешесендә коронавирус инфекциясе булуын ачыклаган. Бу хакта «Татар-информ»га ТР Президенты матбугат хезмәте җитәкчесе Лилия Галимова хәбәр итте.

«Алты кешенең, шул исәптән алар арасында бер баланың анализы Covid-19га уңай булуын күрсәтте. Аларда авыру симптомсыз формада уза, пациентлар үзләрен яхшы хис итә», — диде Галимова.

Аның сүзләренчә, авырулар «Ливадия» шифаханәсендә медицина күзәтүендә булачак. Анда аларны чикне узганнан соң тиешле обсервациягә урнаштырдылар.