Ирек Фәйзуллинның коронавируска анализы тискәре нәтиҗә күрсәткән

Россия Төзелеш министрлыгы башлыгы Владимир Якушев һәм аның урынбасары Дмитрий Волков коронавирус белән авыруы билгеле булды.

(Казан, 2 май, «Татар-информ»). Россия төзелеш, архитектура һәм торак-коммуналь хуҗалык министрының беренче урынбасары Ирек Фәйзуллин ведомствоның башка җитәкчеләре белән бергә коронавируска тест тапшырды. Бу хакта министрлык матбугат хезмәтенә сылтама белән РИА Недвижимость хәбәр итә.

«Алар барысы да коронавируска тестлар тапшырды, әлегә башка уңай пробалар табылмады», — дип хәбәр иттеләр матбугат хезмәтендә.

Элегрәк хәбәр ителгәнчә, Россия төзелеш һәм торак-коммуналь хуҗалыгы министры Владимир Якушев коронавирус белән хастаханәгә салынган, шулай ук Covid-19 инфекциясе аның урынбасары Дмитрий Волковта да табылган.

Төзелеш министрлыгы башлыгы вазифаларын башкаручы итеп министр урынбасары Никита Стасишин билгеләнгән.