Сәламәтлек саклау министрлыгында грипптан прививка ясату зарурлыгы хакында сөйләделәр

Грипптан прививка вакцинаның кайчан кайтып җитүенә карап башланачак.

(Казан, 1 август, «Татар-информ»). ТР сәламәтлек саклау министрының беренче урынбасары Әлмир Абашев «Татар-информ» агентлыгында узган матбугат конференциясендә грипптан прививка ясау зарурлыгы турында белдерде.

«Без грипптан гына түгел, башка йогышлы авырулардан да прививка ясатырга киңәш итәбез. Грипптан прививка вакцинаның (ул федераль бюджет хисабына үзәкләштерелгән тәртиптә китерелә) кайчан кайтып җитүенә карап башланачак. Вакцина август дәвамында кайтып җитәр дип көтелә. Без барлык кешене дә грипптан прививка ясатырга (аеруча бу сезонда) киңәш итәбез», — дип искәртте спикер.

Ул билгеләп үткәнчә, 65 яшьтән узган кешеләргә пневмококк инфекциясеннән прививка ясатырга да тәкъдим итәргә мөмкиннәр.

«Татар-информ» агентлыгы элегрәк хәбәр иткәнчә, яңа төрдәге Covid-19 коронавирусыннан прививка акциясен үткәрү сценарие федераль дәрәҗәдә билгеләнәчәк.