Икътисад 21 сентябрь 2005 10:43

Ел башыннан Алабуганың Эшкуарлыкка ярдәм финанс фонды кече бизнес өчен 40 кредит биргән

Скопировать ссылку

(Алабуга, 21 сентябрь, “Татар-информ”, Гөлшат Солтанова). Ел башыннан Алабуганың Эшкуарлыкка ярдәм финанс фонды шәхси эшкуарларга 40 кредит биргән. Оешма ике ел элек ТР Эшкуарлыкны үстерү агентлыгы һәм Алабуга хакимиятенең уртак тырышлыгы белән төзелгән. Эшкуарларга ярдәм өчен акчалар җирле бюджеттан бүлеп бирелә. Бүген фондның кредит портфеле 10 миллион сумнан арта.

Алабугада хәзерге көндә 3 меңнән артык кече эшкуарлык субъекты теркәлгән, ел саен аларның саны арта бара. Фондка ярдәм итәргә теләүче барлык инвестиция проектлары катгый сайлап алына. Фондның эшләү дәверендә аның белгечләренә 400дән артык эшкуар мөрәҗәгать иткән, әмма аларның 60ы гына кредит алган. Сайлаганда кече серияле производство, авыл хуҗалыгы һәм туризм өлкәләрендәге проектларга өстенлек бирелә. Проектлар мәҗбүри рәвештә Алабуга һәм район территориясендә гамәлгә ашырылырга тиеш. Шулай итеп, хакимият җирле бюджет хисабына шәһәргә кирәкле кече бизнес төрләрен үстерә. Хәзерге вакытта эшкуарларның күбесе сәүдә өлкәсендә мәшгуль.

Сәхифәләр

Ел башыннан Алабуганың Эшкуарлыкка ярдәм финанс фонды кече бизнес өчен 40 кредит биргән