Сарманда яшәүче Вәсимә Хәйруллина "Болгар" радиосы премиясенә лаек булды

25 февраль көнне “Пирамида” күңел ачу комплексында премияне тапшыру тантанасы булды.

(Сарман, 27 февраль, "Татар-информ"). Илсөя Бәдретдинова башкаруында Вәсимә апа Хәйруллина сүзләренә иҗат ителгән “Дәшмәгез” җырына төшерелгән клип “Болгар” радиосының милли музыкаль премиясенә лаек булды – “Иң яхшы клип” номинациясендә җиңүче дип табылды. 25 февраль көнне “Пирамида” күңел ачу комплексында премияне тапшыру тантанасы булды. Анда Вәсимә апа да чакырулы иде, дип яза sarman-rt.ru сайты.

- Җырның сүзләре кулыма эләккәч, музыкасы үзеннән-үзе агылып китте, тирән мәгънәле, зур кичерешләр белән тулы сүзләр тезмәсе миңа матур көй язарга этәрде, - ди җырның авторы Ләйсән Мәхмүтова.

Без райондашыбызны дәрәҗәле танылуы белән ихластан котлыйбыз, киләчәктә дә уңышлар телибез, диелә район хәбәрендә.