Казанда - “Шүрәленең төшенә дә кермәгән...” бәйрәме

(Казан, 25 октябрь, “Татар-информ”). 29 октябрьдә 18 сәгатьтә Татарстанның Милли музеенда “Шүрәленең төшенә дә кермәгән...” исемле кызыклы чара узачак.
Бәйрәмдә музей кунакларын татар һәм рус әкиятләре, риваятьләре геройлары – Убырлы карчык, Су анасы, Албасты, Өрәк, Бичура, Дию пәрие, Җен һәм башкалар каршы алачак. Шулай ук музейда Көнбатыштагы Хэллоуин бәйрәме Ватаны – Бөекбританиядән килгән Убырлы карчык белән дә танышып һәм аралашып булачак. Казан өстеннән очканда, ул тылсымлы себеркесен югалта. Аңа Ватаны булган томанлы Альбионга кайтыр өчен музей кунаклары зирәклек, тапкырлык, нәзакәтлелек һәм башка сыйфатларны күрсәтергә тиеш булачак. Музейда һәр кеше күңел тулы тәэсирләр белән кайтачак, дип хәбәр иттеләр ТР Милли музееның матбугат хезмәтеннән.