Илһам Шакиров баянчысы Әгерҗе районы Иж-Бубый мәктәбенә очрашуга килгән

Рафинат Сәлахов 60 яшьлек юбилеенда иҗатташ дуслары белән бергәләп икенче туган җире – Әгерҗедә концерт куеп китте.

 (Әгерҗе, 25 март, "Татар-информ", "Әгерҗе хәбәрләре", Асия Корбангалиева). Әгерҗе районы Иж-Бубый мәктәбе матур традиция буенча, үзе укытып зур тормышка канат биргән укучыларын бер түбә астына җыйды. Алар арасында күп еллар бөек җырчыбыз Илһам Шакировның баянчысы булып сәхнәдән милли моңнарыбызны халыкка җиткерүче Рафинат Сәлахов та бар иде, дип яза җирле басма.

Иж-Бубый – минем өчен изге җир. Биредә бабам Габдрахман Шляпин беренче колхоз төзегән һәм озак еллар аның рәисе булып эшләгән. Алабуга педагогия институтын тәмамлап, гомер буе Саба районында балаларга белем биргән әнием Сәлимә Шляпина белән бик еш кайта идек бирегә. Иж-Бубыйны мин икенче туган авылым дип исәплим, чөнки җәйге каникулларым шушында үтте, – ди Рафинат әфәнде.

Башлангыч белем алгач, Иж-Бубыйда укырга кала Рафинат. Бишенче һәм алтынчы сыйныфта атаклы Иж-Бубый мәктәбендә белем ала. Биредәге татар мәгърифәте рухы, бөтен дөньяга билгеле Иж-Бубый мәдрәсәсе һавасы, тарихи вакыйгалар кайтавазы урта белем алып, заводта эшләп хезмәт чыныгуы алган егетне Түбән Кама музыка көллиятенә китерә. Аны тәмамлагач, Казанда мәдәният институтында белем ала. Оста баянчы, бик күп музыка коралларында өздереп уйнаучы музыкант Г.Тукай исемендәге Татар дәүләт филармониясенә чакыру ала. Җырчылар Венера Шәрипова, Флера Сөләйманова, Габдулла Рәхимкулов, Зөһрә Сәхәбиева төркемендә музыкант була. Иң күп еллар бергә эшләгән җырчысы – кабатланмас тавыш һәм моң иясе Илһам ага Шакиров. Бергә илне аркылыга-буйга гизә алар, чит илләрдә дә концертлар куялар.

Рафинат Сәлахов инструменталь әсәрләр, җырлар да яза. Җырларын Асаф Вәлиев, Зөһрә Сәхәбиева, Лилия Муллагалиева кебек җырчылар башкара. Бай иҗат тәҗрибәсен хәзер дә яшьләр белән теләп уртаклаша: консерватория студентларын зур сәхнәгә чыгарга әзерли, өстәмә белем бирү педагогы буларак, укучылар белән дә күп эшли.

“Җыен“ фондында әгъза булып торучы Рафинат Ясәви улы “Шәхесләребез“ сериясеннән китаплар чыгару белән дә шөгыльләнә. Татарстан журналистларының “Бәллүр каләм“ бүләгенә дә лаек була. Илһам Шакировның 70, 75, 80 яшьлек юбилейларына багышлап китаплар нәшер итүдә актив эшли. 

Гомере буе сәнгать казанында кайнаган музыкант, композитор, педагог, халыкара конкурслар лауреаты Рафинат Сәлахов 60 яшьлек юбилеенда иҗатташ дуслары белән бергәләп икенче туган җире – Әгерҗедә концерт куеп китте. Аның “Әгерҗем минем“ җырын аеруча озак алкышладылар тамашачылар.

– Иж-Бубыйда авыл музееның актив эшләвенә сокланам. Данлыклы сәүдәгәр Мөхәммәтҗан бай йорты төзелү дә – бик күркәм эш. Мәктәптә юбилей чыгарылыш укучылары очрашуы да бик күңелле үтте. Гомумән, Әгерҗедә шундый күркәм эшләр башкарылуына бик сөенәм, – дип саубуллашты Рафинат Сәлахов.