Уфаның «Нур» татар дәүләт театры спектакль язмаларын онлайн күрсәтәчәк

20 апрельгә кадәр театрда спектакльләр булмый, гастрольләр кичектерелә.

(Казан, 23 март, «Татар-информ»). Уфаның «Нур» татар дәүләт театрында 23 марттан 20 апрельгә кадәр спектакльләр күрсәтелми. Бу коронавирус куркынычы белән бәйле. Шул сәбәпле спектакльләрне онлайн-күрсәтү оештыралар. Бу турыда театрның матбугат сәркатибе Гөлшат Сафина социаль челтәрләрдә хәбәр итте.

Театрның гастрольләре дә кичектерелә. Билетларны тапшырып була.

Архив спектакльләре театрның youtube-каналында урнаштырыла. Сылтамалар якын көннәрдә билгеле булачак.

Инстаграм челтәрендә артистлар белән туры элемтәләр оештырыла, вокал һәм хореография буенча мастер-класслар күрсәтеләчәк, диелә хәбәрдә.