Башкортстанда «Урал-Батыр» эпосы рус телендә басылып чыкты

Дастанны рус теленә шагыйрь, язучы, «Истоки» газетасының баш мөхәррире Айдар Хөсәенов тәрҗемә иткән.

(Казан, 22 август, «Татар-информ»). Башкортстанның «Китап» нәшриятында «Урал-Батыр» башкорт хаклык эпосы рус телендә басылып чыкты. Бу хакта «Башинформ» агентлыгы хәбәр итә.

Дастанны рус теленә шагыйрь, язучы Айдар Хөсәенов тәрҗемә иткән.

  • «Урал-батыр» - башкорт фольклорының иң зур һәм борынгы эпик әсәре. «Китап» нәшрияты сайты хәбәр иткәнчә, укучыга тагын да аңлаешлырак булсын өчен, автор эпосны прозага күчергән.

Әсәр белән беренчеләрдән булып танышкан кешеләр борынгы мифның аңлаешлы тел белән бәян ителүен искәртә. Басма төсле рәсемнәр белән бизәлгән, эпос үзе исә балалар укыр өчен җайлаштырылган. Басманың дизайнын Салават Гыйләҗетдинов эшләгән.

Айдар Хөсәенов шулай ук «Акбүзат» эпосын да русчага тәрҗемә итүен һәм аның «үз сәгатен көтүен» әйтте.