Уфада “Зөләйха күзләрен ача” авторы укучылар белән аралашачак

Гүзәл Яхина башкорт башкаласына бары бер генә көнгә - 27 февральдә киләчәк.

(Казан, 19 февраль, “Татар-информ”). Уфада “Зөләйха күзләрен ача” китабы авторы Гүзәл Яхина романы буенча куелган спектакльне караячак һәм китап укучылар белән аралашачак. Бу хакта “Башинформ” хәбәр итә.

Гүзәл Яхина башкорт башкаласына бары бер генә көнгә - 27 февральдә киләчәк. 

Республика язучылары белән иҗади очрашу Милли китапханәдә узачак. Биредә язучы ике ел эчендә дөньяның берничә телендә басылган “Зөләйха күзләрен ача” китабының титул тышлыклары коллекциясен караячак.

Башкорт дәүләт драма театры фойесында Гүзәл Яхина спектакльгә килгән китап укучылар белән аралашачак, автограф-сессия булачак. Спектакльдән соң  актерлар һәм иҗади төркем белән тамаша хакында фикер алышачак.