Әлмәт театры Керчь халыкара фестивалендә ике номинациядә лауреат булды
Әлмәт театр антик сәнгать фестиваленә «Эзоп» спектаклен алып барды.
(Казан, 16 июнь, «Татар-информ, Рузилә Мөхәммәтова). Әлмәт театрының «Эзоп» спектакле «Боспорские агоны» халыкара антик сәнгать фестивалендә ике номинациядә «Алтын Ника» лауреаты булды.
«Гильермо Фигейредо пьесасы буенча куелган спектакль „Антик теманың заманча укылышы өчен“ һәм „Иң яхшы ир-ат роле“ номинацияләрендә лауреат булды. Сүз Эзоп ролен башкарган Илсур Хәертдинов турында бара», — дип хәбәр итә театр җитәкчелеге.
Спектакльнең режиссеры — Денис Хөснияров, рәссамнар — Александр Мохов, Мария Лукка, композитор — Виталий Истомин, мультимедиа — Наталья Наумова.
Спектакль «Кече ватан театрлары» федераль проекты кысаларында куелган.
«Боспорские агоны» XXIII халыкара антик сәнгать фестивале Керчьта 11 — 16 июнь көннәрендә 23 енче тапкыр үткәрелде.