Костромада Татар мәдәнияте көннәре үтте

Кострома татарларына Татарстанда төшерелгән документаль һәм нәфис фильмнар күрсәтелде.

(Казан, 14 ноябрь, “Татар-информ”). Бу көннәрдә Кострома шәһәрендә Татарстан Республикасы мәдәнияте көннәре үтте. Бу хакта Бөтендөнья татар конгрессы матбугат хезмәте хәбәр итә.

11 ноябрь көнне өлкәнең Халык иҗаты йортында Татарстанда төшерелгән документаль һәм нәфис фильмнар күрсәтелде. Тамашачылар «Бибинур», «Югалту», «Айсылу» кинотасмаларын карады, Шулай ук Татарстан Кинематографистлар берлеге рәисе Илдар Ягъфәров белән очрашу үтте.

12 ноябрь көнне Кострома дәүләт тарихи-архитектура һәм сәнгать музей-тыюлыгында Алабуга дәүләт тарихи-архитектура һәм сәнгать музей-тыюлыгы фондларыннан “Татар милли мәдәнияте күптөрлелеге” күргәзмәсе эшли башлады. Бу чарага Кострома өлкәсе губернаторы Сергей Ситников та килгән иде.

Очрашу ахырында Татарстан сәнгать осталары концерты гөрләде.