Татарстанлыларны “Бөтендөнья Парамузыкаль фестиваль”дә катнашырга чакыралар

Проектта катнашу өчен гаризалар 31 мартка кадәр дистанцион видео-смотр рәвешендә кабул ителә.

(Казан, 13 февраль, “Татар-информ”). Татарстанлыларны “Бөтендөнья Парамузыкаль фестиваль”дә катнашырга чакыралар. Бу хакта Мәдәният министрлыгы матбугат хезмәте хәбәр итә.

“Бөтендөнья Парамузыкаль фестиваль”не оештыручылар катнашучылардан гаризалар кабул ителә башлау хакында белдерә. Фестиваль 2009 елда – Тигез мөмкинлек елында гамәлгә куелып, Россиядә ел саен үткәрелә. Фестивальнең максаты – социаль интеграция, сәламәтлеге һәм иминлек дәрәҗәсенә карамастан, кешенең тигез мөмкинлекләрен күрсәтү, авыр тормыш хәленнән чыга һәм максатка ирешә белүгә ихтыярны күрсәтү.

Төрле елларда әлеге фестивальдә Россиянең 50 дән артык субъекты, шулай ук дистәләгән чит ил вәкилләре катнашкан. Быел чаралар Россия шәһәрләрендә берничә турда узачак.

Проектта катнашу өчен гаризалар 31 мартка кадәр дистанцион видео-смотр рәвешендә кабул ителә.