“Татар халкының этнографик мозаикасы” фотоконкурсы үткәрелә

Фотолар 1 сентябрьгә кадәр кабул ителә

 (Казан, 12 май, “Татар-информ”). ТР Мәдәният министрлыгы “Татар халкының этнографик мозаикасы” фотоконкурсы үткәрә. Анда катнашуга анкета-гариза һәм фотолар 1 сентябрьгә кадәр РФ территориясендә яшәүче 18 яше тулганнардан кабул ителә.

Бәйге “Татар халкының милли бердәйлеген саклау” дәүләт программасы кысаларында оештырыла һәм милли традицияләрне, гореф-гадәтләрне популярлаштыруга юнәлтелә. Конкурсның төп максаты – татар халкының мәдәни мирасын үстерү, саклау һәм популярлаштыруда фотографиянең әһәмиятен һәм өлешен арттыру.

Фотолар 3 номинация буенча Ilnaz.Gazizov@tatar.ru, R.Korchagina@tatar.ru электрон адресларына яки ТР Мәдәният министрлыгына (Казан ш., Пушкин ур., 66/33) кабул ителә: “Халык кул эшләре сәнгате”, “Традицияләр һәм йолалар”, “Портрет”. Бәйгедә катнашучы һәр номинация буенча күп дигәндә 3 эш яки 5 фотодан торган серия тәкъдим итә ала.

Конкурска йомгак 1 октябрьгә кадәр ясала, диелә ТР Мәдәният министрлыгы матубгат хезмәте хәбәрендә.