“Большая книга” милли әдәби премия шорт-листына кертелгән татар хатыны хакындагы роман татар телендә дә дөнья күрәчәк

Автор бу хакта үзе хәбәр итте

 (Казан, 11 ноябрь, “Татар-информ”, Лилия Локманова). Гүзәл Яхинаның “Зулейха открывает глаза” романы татар теленә тәрҗемә ителәчәк. Әлеге китап быел “Большая книга” милли әдәби премия шорт-листына кертелгән.

Бу хакта бүген “Татар-информ” мәгълүмат агентлыгы тарафыннан уздырылган матбугат конференциясендә автор үзе хәбәр итте.

“Романның бер өлеше татар теленә тәрҗемә ителеп, “Сөембикә” журналында бастырылган иде. Хәзер исә без Татарстан китап нәшрияты белән килешү төзеп, аны татар теленә тәрҗемә итәргә һәм бастырып чыгарырга ниятлибез. Якын киләчәктә “Зөләйха күзләрен ача” Татарстан һәм Россия китап кибетләрендә барлыкка килер дип ышанам”, - диде ул.

Мәгълүмат өчен. “Зулейха открывает глаза” романы революциядән соңгы елларда татар авылында булган вакыйгалар белән башлана. Крестьян хатыны Зөләйха, йөзләгән халык белән бергә, 1930 елның кышында Себергә озатыла.

Томана крестьяннар һәм Ленинград интеллигенциясе вәкилләре, җинаятьчеләр, мөселманнар һәм христианнар, мәҗүсиләр һәм Аллага ышанмаучылар, руслар, татарлар, немецлар, чувашлар — барысы бергә Ангара елгасы яры буенда очраша. Көн саен алар рәхимсез дәүләт һәм тайгада үз тормышлары өчен көрәш алып бара.

Роман мәҗбүри күчереп утыртылганнар һәм кулак дип аталганнарга багышлана.