Алла Сурикова Казанда “Россия, елмай!” кинофестивале кайтавазын үткәрергә ниятли

Режиссер бу фестивальнең авторы һәм президенты

 (Казан, 10 сентябрь, «Татар-информ», Камил Әсәдуллин). Кинорежиссер һәм сценарийлар язучы, Россиянең халык артисты Алла Сурикова Казанда “Россия, елмай!” - “Улыбнись, Россия!” музыкаль һәм комедия фильмнары кинофестивале кайтавазын үткәрергә тәкъдим итте. Бу хакта ул “Татар-информ” МА узган матбугат конференциясендә белдерде.

“Биредә бу фестивальнең кайтавазын үткәрергә тәкъдим итәргә телим. Бүген агрессия, сугыш, явызлык, күңелсез вакыйгалар күп, - диде кинорежиссер. – Шуңа күрә, миңа калса, мондый фестивальләрне үткәрү зарур. Без “Россия, елмай!” фестивален Түбән Новгород, Ярославль, Әстерхан, Мәскәүдә үткәрдек”.

Искәртеп узабыз, Алла Сурикова Казанга Х Казан халыкара мөселман киносы фестивалендә катнашу өчен килгән иде.