Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
«Язлар моңы» фестивале Тольятти татар милли автономиясенең 20 еллыгына багышланган
Шәһәрдә «Идел» җыр һәм бию ансамбле оешканнан бирле алтынчы буын балалары «Язлар моңы» фестивалендә катнаша.
(Казан, 10 апрель, «Татар-информ»). Шушы көнннәрдә ике еллык тәнәфестән соң, Тольяттиның «Автоград» мәдәният үзәгендә VIII «Язлар моңы» иҗат фестивале гөрләп узды. Ул Самара өлкәсенең 170 еллыгына һәм Тольятти татар милли автономиясенең 20 еллыгына багышланган иде. Бу турыда «Самара татарлары» сайтында хәбәр ителә.
Чараны Тольятти автономиясе җитәкчесе Ислам хәзрәт Гомәров һәм төбәк Диния нәзарәте рәисе, мөфти Талип хәзрәт Яруллин башлап җибәрде. Мөфти, кеше гомерен ел фасыллары белән чагыштырып, үзебезнең бу дөньяда кем булып яшәвебезне гомеребезнең язында ук ачыкларга, ислам дине ышыгына, татар дәрьясына сыенырга өндәде. Ул Ислам хәзрәтнең Тольятти татар автономиясен уңышлы җитәкләп килүен билгеләп үтте һәм Коръән китабы бүләк итте.
Ислам хәзрәт исә, автоград халкын бәйрәм белән котлаганнан соң, соңгы елларда үткәрелеп килүче күләмле чараларга тукталып үтте. Тольяттида даими рәвештә Сабан туе, «Язлар моңы» фестивале, «Татар кызы» бәйгесе һәм Мәүлид бәйрәме үткәрелеп килә.
Бәйрәмгә Жигулевскидан килгән «Музыкальная артель «Жигулевская Вольница» ансамбле татар көйләреннән тезмә тәкъдим итте. Ирек Шәрәфетдинов җитәкчелегендәге бу үзешчән коллектив күптән түгел генә Халык ансамбле исеменә лаек булган. Самараның «Ялкынлы яшьлек» җыр, бию һәм шигърият ансамбле чыгышы да халык күңеленә хуш килде. Татарстанның атказанган артистлары — җырчы Рөстәм Закиров, автор-башкаручы Ләйсән Мәхмүтова да музыкаль бүләкләрен тапшырды.
Фестиваль кысаларында чыгыш ясаган һәвәскәр артистлар да талантларының бөтен кырларын күрсәтә алды. Тольяттида татар милли-мәдәни мохтарияте эшли башлаганнан бирле, кечкенә бәбкәләр булып оешмага килгән балалар, татар мохитында тәрбияләнеп, аккошлар сыман канатланып китеп, илебезнең төрле төбәкләрендә хезмәт итә.
Шәһәрдә «Идел» җыр һәм бию ансамбле оешканнан бирле алтынчы буын балалары «Язлар моңы» фестивалендә катнаша. Быелгы фестивальдә унбер яшьлек Илсөя Аббязова, тугыз яшьлек Юлия Галәмгирова белән Кәмилә Абсаттарова өченче урынны бүлеште, алты һәм җиде яшьлек Айгөл белән Әдилә Рәхмәтулловалар, әни турында җыр җырлап, икенче урынны алды. Биш яшьлек Руфинә Абдуллова да «Әбием» җыры белән алардан калышмады. Ә унҗиде яшьлек Салават Солтанов, җиткән кыз Диләрә Усманова, яшүсмер Алия Ильясова беренчелекне яулады.
Биючеләр арасында Сабина Сабировага, музыкаль инструментларда уйнаучылардан — скрипкачы Алинә Татарянцка тиңнәр булмады. Фестивальдә балалар гына түгел, олылар да чыгыш ясады. Алар арасыннан Идея Солтанова беренчелекне алды, Мәсгут Хәйбуллинга, сәхнә ветераны буларак, махсус бүләк тапшырылды. Ә осталарның остасы уналты яшьлек Суфия Шәкүрова Гран-при бүләгенә ия булды.
Кызыклы яңалыкларны күзәтеп бару өчен Телеграм-каналга язылыгыз