Бары тик Казанда гына «Халык театры»на татарча кастинг узып була

Камал театрында тыңлауларга барлыгы 63 профессиональ булмаган актер узды, алар үз чыгышларын татар телендә тәкъдим итәчәк.
(Казан, 9 октябрь, «Татар-информ», Марат Ишкилдин). Тыңлаулар рус телендә уздырылучы Россиянең башка шәһәрләреннән аермалы буларак, «Халык театры» конкурсы өчен кастинг Казанда татар телендә үткәрелә. Бу хакта бүген «Татар-информ» мәгълүмат агентлыгында узган матбугат конференциясендә «Халык театры» проектының төбәк координаторы Гөлфия Мотыйгуллина хәбәр итте.«Безгә 88 гариза керде, һәм иң кызыгы, Камал театры - Россиядә актер туган телендә чыгыш ясаячак бердәнбер театр. Катнашучылардан рус телендә бик күп гаризалар алдык, әмма бездә бары тик татар телендә генә. 63 кеше сайлап алынды», — диде «Халык театры» проектының төбәк координаторы Гөлфия Мотыйгуллина.8-9 октябрьдә узачак тыңлаулар нәтиҗәләре буенча, эксперт жюри биш кандидатны сайлап алачак. Алар Камал театрының әйдәп баручы осталары һәм артистлары җитәкчелегендә репетицияләр ясаячак. Катнашучылар театр осталыгының нигезләрен үзләштерә һәм актерлык талантын ача алачаклар.«Халык театры» бөтенроссия конкурсына гаризалар 16 яшьтән алып кабул ителде. Конкурс барышында профессиональ булмаган бер актер сайланачак, ул сәхнәдә тәҗрибәле артистлар белән уйнаячак. Конкурста теләге булган һәркем катнаша ала. Моның өчен театрны ярату һәм иҗади мохитка кереп китү теләге генә кирәк.