Республика яшүсмерләр китапханәсендә – яңа зал

Бүген Республика яшүсмерләр китапханәсендә туган якны өйрәнү һәм матбугат залын тәкъдир итү чарасы узачак

(Казан, 8 октябрь, “Татар-информ”). Бүген Республика яшүсмерләр китапханәсендә туган якны өйрәнү һәм матбугат залын тәкъдир итү чарасы узачак. Анда Татарстанның мәдәният министры урынбасары Ирада Әюпова катнашыр дип көтелә.

ТР Мәдәният министрлыгыннан алган мәгълүматка караганда, быел китапханәнең туган якны өйрәнү һәм милли әдәбият бүлеге туган якны өйрәнү һәм матбугат залына үзгәртеп корыла. Залның фондында 11 мең китап, 170 төрле журнал һәм гәзит саклана. Залда әдәбиятны бирүнең автоматлашкан системасы кулланыла.

Очрашуда Республика яшүсмерләр китапханәсе белән хезмәттәшлек итә торган мәктәп һәм лицейлар мөгаллимнәрен ТР Мәдәният министрлыгы исеменнән Рәхмәт хатлары белән бүләклиячәкләр. Китапханә идарәчеләре укуны популярлаштыру чараларында актив катнашкан китап укучыларына да рәхмәт сүзләрен җиткерергә ниятли.