Әлмәт кызы “Голос” телешоусында Градский командасына узды

Хәзер ул – Югары икътисад мәктәбе студенты

 (Казан, 8 сентябрь, “Татар-информ”). Җыр сәнгатенә мөкиббән китүчеләрне җәлеп иткән “Беренче канал”ның “Голос” телешоусында 19 яшьлек Гөлшат Хамурзина тавышы белән Александр Градскийны һәм Дима Биланны үзенә “каратты”.

Конкурста Гөлшат Уитни Хьюстонның «I Have Nothing» җырын башкарды. “Слепое прослушивание”дә якташыбыз уңышлы чыгыш ясады. Аңа таба борылган Градский һәм Билан арасыннан ул беренчесен сайлады.

Гөлшат эстрада вокалы мәктәбендә, скрипка буенча музыка мәктәбендә укыган, шулай ук фортепиано, гитара, барабанда да уйнау серләрен дә яхшы белә. Хәзер ул – Югары икътисад мәктәбе студенты, дип горурлана “Әлмәт таңнары”басмасы.