Салават башкорт драма театрына яңа баш режиссер билгеләнде

Яшь актриса Лиана Нигъмәтуллина берничә ел дәвамында күп кенә театраль проектларда режиссер буларак катнашкан.

(Казан, 7 октябрь, «Татар-информ»). Бүген Салават башкорт драма театрын коллективына яңа баш режиссер тәкъдим ителде. Бу вазифага Салават театрындагы куелышлары белән билгеле режиссер, яшь актриса Лиана Нигъмәтуллина билгеләнде. Бу хакта «Башинформ» агентлыгы яза.

Лиана Нигъмәтуллина берничә ел дәвамында күп кенә театраль проектларда режиссер буларак катнаша. Тамашачыларга аның С.Маршакның «Кошкин дом», А Пушкинның «Сказка о царе Салтане», З Сөләймановның «Три поросенка», Ш Перроның «Золушка», «Дорожная сказка» һәм «Ай! Горит!» (үз инсценировкалары буенча), «Песнь иволги» (Салават шәһәре балалар музыка мәктәбе укучылары катнашында мюзикл) кебек балалар спектакльләре яхшы таныш.

2 октябрьдә Лиана Нигъмәтуллина тамашачыларга Н.Мусин повесте буенча «Тормыш мизгелләре» спектакле премьерасын тәкъдим итте.