Мәскәүдә татар әдәбияты классигы Дәрдемәндкә багышланган конференциягә әзерләнәләр

Быел шагыйрьнең тууына 160 ел тулды.

(Казан, 6 декабрь, «Татар-информ»). 9 декабрьдә Мәскәүдә Россия дәүләт китапханәсендә татар әдәбияты классигы, шагыйрь һәм фәлсәфәче Закир Рәмиевкә (әдәби тәхәллүсе – Дәрдемәнд) багышланган укучылар конференциясе узачак. Бу хакта Татарстан Республикасының Россия Федерациясендәге Вәкаләтле вәкиллеге матбугат хезмәте хәбәр итә.

Быел шагыйрьнең тууына 160 ел тулды. Нәкъ менә Дәрдемәнд милли татар шигъриятенә нигез салган һәм анда үзенә генә хас лирик-фәлсәфи юнәлеш булдырган. Аның поэзиясе хәзер дә актуальлеген һәм популярлыгын югалтмый.

Очрашуда Дәрдемәнднең татар телендәге һәм рус теленә тәрҗемә ителгән шигырьләре яңгыраячак. Филологлар, татар әдәбияты белгечләре шагыйрьнең тормыш юлы һәм иҗаты хакында сөйләячәк.

Кичә күптән түгел арабыздан киткән Мәскәүнең Татар морзалары мәҗлесе башлыгы Альберт Дашкинга (ул татар халкына Закир Рәмиевне бүләк иткән нәселдән) ихтирам билгесе буларак узачак.