Бүген Татарстандагы үзбәк яшьләре «Минем Үзбәкстан» квизына чакыра

Әлеге чара Үзбәкстан Республикасы Конституциясе көненә багышлана.

(Казан, 5 декабрь, «Татар-информ»). Татарстан Республикасының үзбәк милли-мәдәни автономиясенең яшьләр бүлеге «Минем Үзбәкстан» дип аталган квиз оештыра.

«Безнең ватаныбызның мәдәнияте бай һәм күпкырлы! Без уйлап та карамаган бик күп фактлар бар», — дип сөйләде оештыручылар.

Татарстан Республикасының Үзбәкстандагы вәкиллеге хәбәр иткәнчә, квизда катнашу өчен биш кешелек команда тупларга һәм сылтама аша теркәлергә кирәк. Җиңүчеләргә бүләкләр тапшырачаклар.

Әлеге чара 8 декабрьдә уздырыла торган Үзбәкстан Республикасы Конституциясе көненә багышлана. 

Квиз 5 декабрьдә, 17:00 сәгатьтә, Казан шәһәре, Павлюхин урамы 57а адресы буенча урнашкан «Халыклар дуслыгы» йортында була, диелә хәбәрдә.