Студентлар нәфасәт кагыйдәләрен өйрәнәчәк

Студентлар нәфасәт кагыйдәләрен өйрәнәчәк

(Казан, 4 февраль, «Татар-информ», Дания Моисеева»). «Мәгариф» китап нәшриятында югары уку йортлары өчен беренче мәртәбә эстетика (нәфасәт) дәреслеге дөнья күрде.

Казан сәнгать академиясе профессоры, филология фәннәре докторы Казбек Гыйззәтов язган «Нәфасәт» дәреслеге ике китаптан тора. Әлегә аның беренчесе нәшер ителде. Ул «Нәфасәтнең нигез проблемалары. Нәфасәтнең тарихы» дип атала. Бу китапта эстетик мәсьәләләр борынгы антик чордан алып бүгенге көнгә кадәр һәм шулай ук татар зыялылары үрнәгендә дә яктыртыла.

«Мәгариф» нәшриятында соңгы вакытта башка укыту әсбаплары да дөнья күрде. Әйтик, Альберт Яхинның « 4нче сыйныфта әдәбият дәресләре» укытучылар өчен методик кулланма буларак язылган.