Төмәндә яшәүче галимә «Татарча диктант»ка бүгенге язучылар текстын алырга тәкъдим итә

Ханисә Алишина «Татарча диктант» акциясенә кагылышлы тәкъдимнәрен җиткерде.

(Казан, 1 октябрь, «Татар-информ», Рузилә Мөхәммәтова). Татарча диктант өчен текст сайлау эшенә Татарстан Язучылар берлеге алынырга тиеш дип саный Төмәндә яшәүче татар галимәсе Ханисә Алишина.

«Без татарча диктантны алтынчы тапкыр үткәрдек. Тәҗрибәмнән чыгып, Төмәндә татар телендә диктант язуга ихтыяҗ зур дип әйтә алам. Шуннан чыгып, „Татарча диктант“ акциясен оештыруга карата тәкъдимнәрен бар», - диде ул Казанда язучы һәм тәрҗемәчеләр белән очрашуда.

Галимәнең беренче тәкъдиме — «Татарча диктант» акциясенең бердәм көнен булдыру. «Аны ниндидер сәяси акциягә туры китереп ясыйбыз. Сайлаумы анда, җанисәпме — шулар күздә тотып эшләнә», — дип зарланды ул.

Икенче тәкъдим — диктантны бүгенге прозаиклар әсәрләре буенча язу. «Югыйсә, без татарча диктантны күптән вафат булган татар әдәбияты классиклары әсәрләре буенча гына ясабыз. Бүгенге укучыга ул текстлар катлаулы», - диде ул.

Ханисә Алишина «Сәндерәдән сикереп төште», дигән җөмләне мисал итеп китерде. Ул бу сүзнең кулланылыштан төшеп калуын, бүгенге укучының аны белмәвен искәртте. Бүгенге язучыны пропагандалау өчен бүгенге заман текстларын кулланырга кирәк дип нәтиҗә ясады ул.

«Быел Гомәр Бәширов әсәре буенча яздык. Быелгы текст минем өчен авыр түгел иде. Ләкин халык өчен кыенрак булгандыр. Элекке текстлар бүгенгеләр өчен архаиктыр», — дип галимә белән килеште Язучылар берлеге рәисе Ркаил Зәйдулла.

Өченчедән, галимә диктант язучыларга бүләк итәрлек сертификатлар булмавына зарланды. «Телевидениедән татфакта татарча диктант язылуын гына күрдем. Ә сез районнарда язу белән мактаныгыз!» — дип тәмамлады ул чыгышын.