«TATARICA» оркестры Казахстанда узачак фестивальдә катнаша

3-6 июль көннәрендә Караганда шәһәрендә «Улы дала сазы» («Олы дала моңы») I Халыкара төрки музыкасы фестивале узачак
(Казан, 1 июль, “Татар-информ”). 3-6 июль көннәрендә Караганда шәһәрендә «Улы дала сазы» («Олы дала моңы») I Халыкара төрки музыкасы фестивале узачак. Анда Татарстан республикасыннан Казан дәүләт консерваториясенең дирижер Ринат Халитов җитәкчелегендәге «TATARICA» оркестры чыгыш ясаячак.
Акимат һәм Караганда өлкәсе Мәдәният идарәсе оештырган әлеге фестиваль Казахстан Республикасы Президенты Нурсолтан Назарбаев тууына 70 ел тулуга багышлана. Чараның максаты – төрки мәдәниятне пропагандалау. Концертларда төрки халыклар музыкасы яңгыраячак. Фестивальдә Татарстаннан тыш, Үзбәкстан, Башкортстан, Казахстан, Хакассия, Төркмәнстан һәм төрки иҗат коллективлары катнашыр дип көтелә. Аның йомгаклау концертында Горняков Мәдәният Сарае сәхнәсендә барлык катнашучылар коллективларыннан җыелма оркестр чыгыш ясаячак, дип хәбәр иттеләр ТР Мәдәният министрлыгының матбугат хезмәтеннән.