Быел Болгарда һәм Зөядә алты яңа музей ачылачак
Бер музейда Абдулла Алишка багышланган экспозиция куелачак, диде Татьяна Ларионова.
(Казан, 23 март, «Татар-информ», Арсений Маврин). Быел Болгар һәм Зөядәге музейларның гомуми саны 19га җитәчәк. Бүген Казан Кремлендә узган республика «Яңарыш» фондының Попечительләр һәм Административ советлары утырышында фондның башкарма директоры Татьяна Ларионова шул хакта хәбәр итте.
Болгарда ел ахырына кадәр музейлар саны 10га тулачак. Хәзерге вакытта тарихи биналарда төзекләндерү эшләре бара. Аларның берсендә татар шагыйре һәм язучысы Абдулла Алишка багышланган экспозиция булдырылачак. Шулай ук күргәзмәләр залы – лапидарий: таш плитәләрдәге борынгы язма үрнәкләр экспозициясе ачылыр дип көтелә. Тагын бер музей «Елга буендагы шәһәр» дип аталачак.
«Зөя утрау шәһәрлегендә музейлар саны тугызга җитәчәк. Биредә тагын өч музей («Агач архитектурасы музее», «Элеккеге Ольгин приюты бинасындагы музей экспозициясе» һәм «Иконалар музее») үз ишекләрен ачачак. Утрауга республика музейларыннан иконаларның кире кайтарылачагы турындагы килешүгә ирешелгән инде», - диде Татьяна Ларионова.