Рөстәм Миңнеханов: “ТР нефть химиясе комплексының стратегик үсеше этилен комплексына бәйле булачак”

ТР Президенты фикеренчә, нефть химиясе комплексына базарда сорау зур булган яңа материаллар эшләп чыгаруга йөз тотарга кирәк

(Казан, 26 июль, "Татар-информ", Сергей Семеркин). Бүген ТР Министрлар Кабинетында Татарстан Республикасы Президенты, “Татнефтехиминвест-холдинг” ААҖ Директорлар советы рәисе Рөстәм Миңнеханов җитәкчелегендә “Татнефтехиминвест-холдинг” ААҖ Директорлар советы утырышы узды.
Утырышта “Татнефтехиминвест-холдинг” ААҖ генераль директоры Рафинат Яруллин ТР нефть һәм газ химиясе комплексы предприятиеләренең 2010 елның беренче яртыеллыгында башкарган эшчәнлеге нәтиҗәләре турында бәян итте.
2010 елның 6 ае нәтиҗәләре буенча нефть һәм газ химиясе комплексы буенча тауар продукциясе сату күләме 245,9 миллиард сум (107,6 процент), шул исәптән химия һәм нефть химиясе предприятиеләре буенча 81,4 миллиард сум (120,3 процент) тәшкил иткән.
Нефть һәм газ химиясе комплексы предприятиеләре буенча салым салуга кадәрге табыш – 32,7 миллиард, шул исәптән химия һәм нефть химиясе предприятиеләре буенча 5 миллиард сум булган. Консолидацияләнгән бюджетка күчерелгән акча – 11,8 миллиард, шул исәптән химия һәм нефть химиясе предприятиеләре буенча 2,23 миллиард сум тәшкил иткән.
Тармакта айлык уртача хезмәт хакы – 23533, шул исәптән химия һәм нефть химиясе предприятиеләре буенча 21036 сум булган.
“Дөньяда полимерлар базары күтәрелеш кичерә”, - дип белдерде Рафинат Яруллин. Аның сүзләренә караганда, беренче яртыеллыкта Татарстанда 701 мең тоннадан артык полимер җитештерелгән, полиэтилен эшләп чыгару 407 мең тоннага кадәр арткан.
“Нефть химиясе комплексы икътисадның үсеш ноктасы булып кала. ТР нефть химиясе комплексының стратегик үсеше этилен комплексына бәйле булачак”, - дип ассызыклады Рөстәм Миңнеханов. ТР Президенты фикеренчә, нефть химиясе комплексына базарда сорау зур булган яңа материаллар эшләп чыгаруга йөз тотарга кирәк.