Татарстанда илкүләм проект буенча Бөгелмә-Урал автомобиль юлы участогы төзекләндерелә

Эшләр барышында асфальт-бетон катламының өске өлешен ремонтлаячаклар һәм юл кырыйларын ныгытачаклар.

(Казан, 25 март, «Татар-информ»). Татарстанның Бөгелмә районында «Имин һәм сыйфатлы автомобиль юллары» илкүләм проекты буенча быел Бөгелмә — Урал автомобиль юлының 1,1 километр озынлыктагы участогы ремонтланачак. Бу хакта Татарстан Транспорт һәм юл хуҗалыгы министрлыгы хәбәр итә.

«Асфальт-бетон катламының өске өлешен төзекләндерәчәкләр һәм юл кырыйларын ныгытачаклар», - диелгән министрлык хәбәрендә.

Узган ел илкүләм проект буенча бер километрга якын озынлыктагы әлеге автомобиль юлы участогы ремонтланган инде.

Ул Оренбург өлкәсе белән чиккә чыга һәм Ижевск — Бузулук — Казахстан транспорт коридорының бер өлеше булып тора. Биредә тәүлегенә 5 меңнән артык автомобиль хәрәкәт итә.

РФ Президенты Владимир Путин инициативасы белән эшләнгән илкүләм проектлар Россиядә 2019 елдан бирле тормышка ашырыла.