Р.Миңнеханов: “Консолидацияләнгән бюджетның үтәлеше буенча эшне канәгатьләнерлек дип саныйбыз”

2011 елның 9 аенда Татарстан Республикасы консолидацияләнгән бюджетының салым һәм салым булмаган керемнәре 98,2 миллиард сум тәшкил иткән

(Казан, 24 октябрь, «Татар-информ»). 2011 елның 9 аенда Татарстан Республикасы консолидацияләнгән бюджетының салым һәм салым булмаган керемнәре 98,2 миллиард сум тәшкил иткән.
Федераль акчаларны да исәпкә алып, 9 айда Татарстан Республикасы консолидацияләнгән бюджеты керемнәренең гомуми күләме 138,7 миллиард сум тәшкил иткән. Бүген республика консолидацияләнгән бюджетының 2011 елның 9 аендагы үтәлеше нәтиҗәләре һәм 2011 елның ахырына кадәр финанс, казначылык һәм салым органнарының бурычлары турындагы ТР финанс, казначылык һәм салым органнары республика киңәшмәсендә әнә шундый мәгълүматлар китерелде. ТР Хөкүмәте йортында узган киңәшмәне Татарстан Президенты Рөстәм Миңнеханов үткәрде.
Киңәшмәне ачып, республика башлыгы ТР консолидацияләнгән бюджеты үтәлешенә квартал саен нәтиҗә ясалуын искәртте. “Тулаем алганда, 9 айдагы нәтиҗәләр буенча без бюджет үтәлеше буенча эшне канәгатьләнерлек дип саныйбыз. Безнең төп чыгым йөкләмәләре үз вакытында һәм тоткарлыкларсыз үтәлде”, - дип белдерде Р.Миңнеханов.
Республика башлыгы кризис чорында республика тарафыннан бюджеттагы касса аермасын бетерү һәм Универсиадага әзерлек эшләре өчен кредит ресурслары җәлеп ителүен билгеләп үтте.
Рөстәм Миңнеханов хәбәр иткәнчә, “Дәүләт (муниципаль) учреждениеләрнең хокукый хәлен камилләштерүгә бәйле рәвештә Россия Федерациясенең аерым закон актларына үзгәрешләр кертү турында”гы 83 нче федераль законның үтәлеше һәм Дәүләт торак фондына акча җыю бюджет үтәлешендә төп өстенлекләр булып кала. Р.Миңнеханов Казанның әлегә акча җыю планын тулы күләмдә башкармавына игътибар юнәлтте.
ТР финанс министры Радик Гайзатуллин үз докладында хәбәр иткәнчә, 2011 елның 9 аенда Татарстан Республикасы консолидацияләнгән бюджетының салым һәм салым булмаган керемнәре 98,2 миллиард сум тәшкил иткән, бу еллык планның 81 процентын тәшкил итә. Федераль акчаларны да исәпкә алып, 9 айда Татарстан Республикасы консолидацияләнгән бюджеты керемнәренең гомуми күләме 138,7 миллиард сум тәшкил иткән.
Р.Гайзатуллинның сүзләренә караганда, Татарстан консолидацияләнгән бюджет керемнәре, шулай ук җан башына уртача керем буенча Идел буе федераль округында әйдә баручылардан санала.
Табышка салым республика бюджетының төп чыганагы булып тора, ул 9 ай эчендә 38,2 миллиард сум күләмендә мобилизацияләнгән, бу еллык планның 90 проценты дигән сүз. 9 айда Татарстан Республикасы консолидацияләнгән бюджеты чыгымнары - 141,9 миллиард сум (70 процент), республика бюджеты чыгымнары 112,8 миллиард сум (69 процент) тәшкил иткән. Җирле бюджетларга бюджетара трансфертлар планлаштырылган күләмдә (19,3 миллиард сум) бүлеп бирелгән.
Татарстан Республикасы консолидацияләнгән бюджетына 9 айда килгән керем дәүләт һәм муниципаль учреждениеләрдә 1 сентябрьдән арткан хезмәт хакын үз вакытында түләргә, коммуналь хезмәтләр түләргә, республика һәм җирле бюджетларның башка беренче чираттагы һәм социаль әһәмияткә ия чыгымнарын тәэмин итәргә мөмкинлек биргән.
2012 елга консолидацияләнгән бюджетның керем өлеше – 134,3 миллиард сум, чыгым өлеше 3,2 миллиард сум күләмендәге дефицитны исәпкә алып, 137,5 миллиард сум тәшкил итәр дип фаразлана. 2012 елга республика бюджеты керемнәр буенча – 106,5 миллиард сум, чыгымнар буенча 3,6 миллиард сумлык дефицитны исәпкә алып, 110,1 миллиард сум күләмендә билгеләнә.
Киңәшмәгә йомгак ясап, Рөстәм Миңнеханов дәүләт милкен нәтиҗәле куллануга игътибар юнәлтте. ТР Президенты җир һәм милек мөнәсәбәтләре министры Азат Хамаевка дәүләт милкен сату тәртибенә анализ ясарга кушты.
Республика башлыгы шулай ук предприятиеләрнең эшенә күзәтчелек итәргә күрсәтмә бирде. Бу хакта ТР Президентының матбугат хезмәте хәбәр итә.