Forbes журналы иң күп табыш алучы Россия миллиардерларын атады

Эшмәкәрләрнең керемнәре сатылган активлар һәм алынган дивидендларның гомуми бәясеннән чыгып билгеләнә.

(Казан, 23 март, «Татар-информ»). Forbes журналы керемнәре иң югары булган Россия миллиардерлары рейтингын бастырып чыгарды. Анда ун эшмәкәр кергән.

Эшмәкәрләрнең керемнәре узган елның 18 февраленнән быелның 9 февраленә кадәрге чорда сатылган активлар һәм алынган дивидендларның гомуми бәясеннән чыгып формалаштырыла.

Рейтингның иң югары баскычын Кирилл Шамалов били, аның «Сибур» акцияләрен сатудан һәм дивидендлардан кергән табышы 2,3 миллиард доллар белән бәяләнә. Икенче баскычта Алексей Мордашов урнашкан, аның «Северсталь» акцияләрен сату һәм Nordgold дивиденларыннан кергән табышы 1,56 миллиард доллар тәшкил итә. Өченче баскычта – Владимир Лисин. Аны Яңа Липецк металлургия комбинаты 1,23 миллиард долларга баеткан.