Эксперт: Рубль курсы 2021 елга ныгыячак

(Казан, 20 апрель, «Татар-информ»). Рубль курсы киләсе елда ныгыячак. Бу хакта ВТБ банкы башлыгы Андрей Костинга сылтама белән «Известия» яза.

«Долларга 80 сум чиген узмаячагыбызга ышанам, киләчәктә, 2021 елда, рубль курсы ныгыячак», — диде Костин. Эксперт фикеренчә, РФ Финанс министрлыгы һәм Үзәк Банкның кирәк булганда курска ярдәм итү мөмкинлеге бар.

Доллар 15 процентка кыйммәтләнде, һәм бу «банклар өчен рөхсәт ителгән чикләрдә», - дип искәртте ВТБ башлыгы.

Төп ставканы арттырмауда Үзәк Банк карары - мөһим казаныш, диде Костин. Аның сүзләренчә, Үзәк Банк  банкларга эшмәкәрлеккә һәм гражданнарга ярдәм итү өчен булдырылган программалар кысаларында «арзанрак акча» бирә алыр иде.