Норвегия делегациясе профсоюз оешмасы эшчәнлеге белән танышу өчен Әлмәткә килде

Делегация вәкилләре «Нефтяник» хоккейчыларны әзерләү үзәге һәм «Мирас» спорт комплексында да булды.

(Әлмәт, 20 февраль, «Татар-информ», «Әлмәт таңнары»). Норвегия нефтьчеләренең профсоюз вәкилләреннән торган делегация тәүге тапкыр Әлмәттә булды. Сәфәрнең максаты «Татнефть» компаниясенең профсоюз оешмасы эшчәнлеге, хезмәтне саклау һәм сәнәгать куркынычсызлыгы белән танышу иде. Бу турыда район басмасы хәбәр итә.

Норвегиянең нефть предприятеләре хезмәткәрләре «Татнефть — кадрлар әзерләү үзәге» ндә һәм «Таграс-РемСервис» җәмгыятенең хезмәтне саклау һәм сәнәгать куркынычсызлыгы буенча профилактик белем бирү мәйданчыгында кунак булдылар.

Моннан тыш, делегация вәкилләре «Нефтяник» хоккейчыларны әзерләү үзәге һәм «Мирас» спорт комплексында да булды. Industry Enerdgy профсоюзының вице-президенты Терье Вальскор әлеге социаль объектларны җиһазландыру буенча аларның уникаль булуын әйтте.