Миңнеханов Мишустинга шәхси эшкуарларга ярдәм күрсәтү үтенече белән мөрәҗәгать итте

Үзмәшгуль гражданнар һәм шәхси эшкуарлар 2020 елның 1 мартыннан дәүләт ярдәме күрсәтелергә тиешле затлар категориясенә эләкмәгән.

(Казан, 18 апрель, «Татар-информ», Алексей Угаров). Татарстан Президенты Рөстәм Миңнеханов РФ Премьер-министры Михаил Мишустинга шәхси эшкуарлар һәм үзмәшгульләргә ярдәм күрсәтү үтенече белән хат юллады. Бу хакта ТР Президентының матбугат хезмәте җитәкчесе Лилия Галимова хәбәр итте.

«РФ Хөкүмәте карары нигезендә, 12,1 мең сум күләмендәге эшсезлек буенча пособие 2020 елның 1 мартыннан эштән җибәрелгән һәм билгеләнгән тәртиптә эшсез дип табылган гражданнарга түләнә. Әлеге категориягә шәхси эшкуарлар һәм үзмәшгульләр керми. Бу катлаулы чорда әлеге гражданнар да акчалата ярдәмнән мәхрүм калмасын өчен, Рөстәм Миңнеханов Премьер-министр адресына аларны исемлеккә кертү үтенече белән хат юллады», — диде Галимова.

ТР Президентының матбугат хезмәте җитәкчесе билгеләп үткәнчә, үзмәшгульләр дигәндә һичьюгы бер тапкыр булса да профессиональ керемгә салым түләгән гражданнар хакында сүз бара.