Дәүләт сатып алулары өчен даруларны тасвирлау тәртибе расланды

Документта препаратның дару формасын, дозировкасын һәм яраклылык вакытын күрсәтергә кирәк.

(Казан, 17 ноябрь, «Татар-информ»). Россия Премьер-министры Дмитрий Медведев дәүләт ихтыяҗлары өчен сатып алына торган дару препаратларын тасвирлау тәртибе турындагы карарга кул куйды. Шул хактагы документ Россия Хөкүмәте сайтында дөнья күргән.

«Сатып алу турындагы документта препаратның дару формасы, дозировкасы һәм яраклылык вакыты күрсәтелергә тиеш», – диелә документ текстында.

Моннан тыш, даруны тасвирлаган вакытта препаратның нинди юллар белән кертелүе, ә педиатриядә кулланыла торган дарулар өчен баланың яше кебек критерийларның да исәпкә алынуы ихтимал.

Карар 2018 елның 1 гыйнварыннан үз көченә керә.